你地又係因為咩原因叫另一半做BB呢？？
一次，我如常地、有啲嘔心咁，叫我女友：「BB！」
但佢就好反常地，好似哲學家上身咁反問我：「知唔知點解拍拖要叫大家做BB？」
係喎……點解呢……有原因㗎咩？
我：「Sweet囉！當對方BB仔咁鍚！所以叫對方做BB，唔係咩？」
我以為咁答實冇死啦……但佢甩開我隻手，皺住眉頭咁話：「哼！你諗掂先好拖返我呀！」
平時都係隨口一句，叫下花名，叫下BB，乜有意義㗎咩……我真係諗唔通，睇唔透……
我嘗試努力咁答：「因為BB仔好可愛，妳又咁可愛，所以就叫BB！」
佢：「咁你都唔可愛啦，我咪又叫你做BB！」
我：「……」
佢：「畀多一分鐘你諗！」
我：「一分鐘！？妳太睇小我喇！咁簡單嘅問題，咪就係…咪就係…唉，我唔知呀，好頭痛呀！」
佢：「次次叫你諗我哋啲嘢，你都頭痛！搞錯！」
呢個世紀大難題，就喺佢拖返住我隻手嘅時候逐步解開……
佢話：
「第一，BB係開心就笑，唔開心就喊，
喺愛人面前，我哋唔需要再扮大人，
可以隨意隨地流露摯真嘅情感；」
「第二，喺呢個世界，好多人都戴住面具，
猜猜度度好攰，但喺對方面前，
我哋都好似BB咁單純，冇嘢要暪大家；」
女人個腦真係唔簡單！當我以為第三樣一定係更加有深度嘅諗法，點知佢話：
「第三，好簡單啫，我想好似BB咁日日瞓飽就食、
食飽就瞓，乜都係唔使做！所以……」
我：「所以我唔好再叫你BB~」
佢：「所以你要快啲娶我做少奶奶！」
我：「日日咁懶，妳唔係怕肥咩？」
佢：「怕咩喎！BB係肥㗎啦！」
無錯，呢個世界好複雜，生活愈嚟愈艱難，將來唔知會幾辛苦，幾時儲夠錢結婚都唔知。
喺呢一刻，我只能夠拖住佢，應承佢，會一直當佢BB咁，好好照顧佢。
-------------------------
喜歡的話like我的page，會有更多故事及散文
FB: 莎比亞
Follow IG睇獨家sweet相: sapeiar
最新出版：《鬼叫我唔識拍拖》
網上試閱：http://on.fb.me/1PKxJnS
Search